الصفحات

السبت، 20 مارس 2010

وحشتينى اوى



وحشتينى اوى نفسى اشوفك ولو لحظه نفسى احس انفاسك ثوانى
نفسى احضنك والمسك وفى حضنك ابكى واشتكى واحكى مامر بى بعد فراقك
بيقولو انك حسانى وشيفانى
مرت سنين على فراقك
نصيب وقدر واستحاله نمنعه
اوقات اتمنى رؤياكى حته فى احلامى
اوقات اتمنى تنتهى الحياه
علشان بس اجرى عليكى واحضنك
بقولها اوى وحشتينى ياامى
ياترى حسانى
لو ترجع تانى الايام
لكنت بوست تراب رجليكى
لكنت شيلتك من على الارض شيل
لكنت قولت لكل العالم هى دى امى
نعمه واتحرمت منها
يمكن عشت حياتى
يمكن قابلت بشر
لكن زيك ماشفت قمر
اه لو يرجع تانى الزمن
اشتقت لكى اوى اوى
فراقك صعب اوى اوى
مفتقداكى اوى اوى
وحشتينى يااغلا الناس
وحشتينى ياامى

هناك 11 تعليقًا:

  1. حبيبتي فضفضة يا قلبي
    بجد خليتيني ابكي يا قلبي من كلامك المؤثر اوي ده

    و مش عارفة ارد عليكي او اعلق اقولك ايه ؟؟
    بس مفيش في ايدينا يا قلبي نقول غير ربنا يرحمها يا رب
    و نحتسبها عند الله في جنات الخلد و النعيم يا رب

    و تدعي ربنا انك تقابليها ان شاء الله في الجنة

    خلي بالك من نفسك و كوني شجاعة و عيشي حياتك صح
    لان ده صدقيني اللي يسعد مامتك و يخليها فخورة ببنتها الحبوبة

    بجد حبيتك اوي يا فضفضة يا قلبي
    و اتمنى نتعرف و نكون اصحاب
    و اكيد شرف ليا و الله

    خلي بالك من نفسك يا قلبي

    خالص حبي و حبي و تقديري

    ردحذف
  2. صديقتى مهمومه
    اشكرك على مواساتك لى فى وقت ضيقى
    انا بخير وماشيه فى الطريق الصح الحمدلله ولا تقلقى انا طلعت شحنه بسيطه من ال حساه نتيجه لفقدانى اعز حبيبه , الله يرحمها وكلنا راحلون
    وانا برضوا يشرفنى اكون صديقتك واقرب منك اكتر ان شاء الله الخير والحب يجمعنا يااعز صديقه

    ردحذف
  3. السلام عليكم
    ربنا يرحمها ويرحم جميع اموات المسلمين
    اثرتي فيا وكلامك تعبني لان انا قريبه من ماما اوي
    وحسيت بشعورك ربنا يصبرك ادعيلها واقرأي لها ا لفاتحه لان بجد قرأت الفاتحه ليها ولكل المسلمين
    دومتي بخير

    ردحذف
  4. القمر الباكى
    اشكرك يا صديقتى على احساسك بى ودعواتك لجميع المسلمين بالرحمه اللهم امين , وربنا يخليلك والدتك الحبيبه ويحميها لكى وانتى حطيها جوا عنيكى وارضيها بقدر المستطاع واسعديها وخديها بحضنك دايما ربنا يسعدك ويفرحك بيها يارب دايما
    مره تانيه متشكره جداصديقتى داليا

    ردحذف
  5. ربنا يصبر قلبك

    الغاليين غيابهم بيزيد ثقله على الروح بمرور الوقت
    و الواحد بيظن ان العكس هيحصل
    لكن يكتشف ان اخف الأشياء بتخلص
    زى العياط
    و التكشير
    و لبس الأسود

    و يروح كله
    و يفضل وجع الأفتقاد
    و ملاصقة الأحباب لكل تفاصيل الحياة
    و الحزن الذى يكبر و شكلاً يبدو انه بيتلاشى

    ربنا معاكى
    و يعوضك عن حبها المفتقد
    بحنان مماثل ف اخلاصه
    و نقائه
    تحياتى الخالصة ليكى

    ردحذف
  6. عزيزتى فاتيما
    اشكرك على كلامك ودعائك لى
    فعلا الحاجات البسيطه بتروح وتنتهى زى التكشير واللبس الاسود ولكن يبقا الالم والافتقاد للحبيب احساس صعب جداااااا قاتل فى بعض الاوقات خاصة وقت احتياج الحبيب المفتقد ولكن اللهم لا اعتراض وربنا يصبر كل انسان مفتقد اعز حبيب له وخاصة الام

    ردحذف
  7. ربنا يرحم امك ويرحم امواتنا جميعا
    عارفة انه ما ينفعش اقولك اعتبرينى امك ولو انى بعنيها بس مفيش ايا كان يقدر يعوض الام خصوصا
    قلبى معاكى ودعواتى لامك بالرحمة وليكى براحة البال

    ردحذف
  8. dreem
    اشكرك جدا لكلماتك واحساسك المرهف انا عارفه انك حاسه بى لان جواكى ام ومشاعر واحاسيس طيبه
    نورتينى

    ردحذف
  9. فضفضة....
    الله يرحمهاويجعل مثواها جنات عدن تجرى من تحتها الأنهار
    ويفرش قبرها من الديباج والسندس والإستبرق
    ويسقيها من حوض نبينا محمد صلى الله عليه وسلم وبيده الشريفة شربة لاتظمأ بعدها أبدا
    ويفتح لها فى قبرها بابا من الفردوس الأعلى
    يارب ... قولى معى ياشيماء آمين

    ردحذف
  10. استاذ فاروق
    اشكرك على دعواتك الطيبه لامى
    ولكن عفوا اسمى مش شيماء
    نورتنى واسعدنى وجودك

    ردحذف
  11. اشكرك جدا لكلماتك

    ردحذف

عبر برحتك